Сезон нәтиҗәләре буенча иң яхшы ишкәкчеләрне бүләкләү Идел буе университетының Спортның ишкәк ишү төрләре үзәгендә узды. Югары нәтиҗәләр күрсәткән спортчыларны һәм тренерларны Татарстан Республикасы спорт министры Владимир Леонов һәм аның беренче урынбасары Хәлил Шәйхетдинов, шулай ук Казанның Физик культура һәм спорт комитеты рәисе Линар Гарипов котлады. Идел буе университеты ректоры Рафис Борһанов та ишкәкчеләр уңышын билгеләп үтте.
"Республика спортка ярдәм итүгә, объектларны үстерүгә һәм төзекләндерүгә зур акчалар һәм ресурслар бүлеп бирә. Спортның ишкәк ишү төрләре үзәгендә иң заманча тренажерлар һәм бассейннар урнашкан. Без барыбыз да — федераль һәм республика спорт министрлыгы, Казан шәһәре һәм Идел буе университеты-Россиядә спортны үстерү буенча гомуми бурычны үтибез. Нәтиҗәләр безнең дөрес юнәлештә баруыбызны күрсәтә", - дип уртаклашты Рафис Борһанов.
Атаклы ишкәкчеләр арасында Идел буе университеты вәкилләре дә бар. Татарстан Республикасы спорт министрының Рәхмәт хатларын чыгарылыш сыйныф укучылары Полина Мухорчева һәм Альбина Сафиуллина, шулай ук аспирантка Александра Константинова алды. Студентлар Диләрә Сабурова, Дарья Шинкарева, Никита Филаретов һәм Әмир Шиһапов та спорт сезонында югары нәтиҗәләр күрсәттеләр.
"Без ишкәк ишүгә зур игътибар бирәбез-спортчыларны әзерләү өчен яхшы шартлар тудыру өчен күңелебезне һәм йөрәгебезне салдык. Заманча бассейннар һәм ишү каналы ярдәмендә нәтиҗәләр елдан – ел яхшырачак, дип саныйм, - диде Владимир Леонов. - Җәй көне биредә зур турнир – БРИКС илләре уеннары узды. Без турнирны оештыру буенча да, Татарстан җыелма командасының чыгышы буенча да югары бәя алдык. Мондый шартларда спортчыларның алга таба үсешкә мотивациясе бар"»
Текст: Аделина Храмова
